Deu 31 | NdeIBE | STEP | UMosi waphuma wayakwethula lamazwi kubo bonke abako-Israyeli wathi:

Deuteronomy 31

UJoshuwa uzathatha isikhundla sikaMosi

1 UMosi waphuma wayakwethula lamazwi kubo bonke abako-Israyeli wathi:

2 “Sengileminyaka elikhulu lamatshumi amabili yokuzalwa angisenelisi ukulikhokhela. UJehova usethe kimi, ‘Awusayi kuchapha iJodani.’

3 UJehova uNkulunkulu wenu nguye ozachapha phambi kwenu. Uzabhubhisa lezizizwe phambi kwenu, lina lizathatha ilizwe lazo libe ngelenu. UJoshuwa laye uzachapha ahambe phambi kwenu, njengokutsho kukaJehova. 4 INkosi izakwenza lokho eyakwenza kuSihoni lo-Ogi, amakhosi ama-Amori, eyababhubhisa yatshabalalisa lamazwe abo. 5 UJehova uzabanikela kini, lina-ke kufanele lenze lokho engililaye khona. 6 Qinani libe lesibindi. Lingesabi lithithibale ngenxa yabo, ngoba uJehova uNkulunkulu wenu uhamba lani, kayikulitshiya njalo kayikulifulathela.”

7 Ngakho uMosi wasebiza uJoshuwa wasesithi kuye phambi kwakhe wonke uIsrayeli, “Qina njalo bana lesibindi, ngoba kumele uhambe lalababantu kulelolizwe uJehova afunga kubokhokho babo ukubanika, njalo uzamele ubabele lona ubahlukanisele libe yilifa labo. 8 UJehova ngokwakhe uhamba phambi kwakho njalo uzakuba lawe; kasoze akutshiye loba akufulathele. Ungesabi; ungapheli amandla.

Ukufundwa koMlayo

9 UMosi wawuloba phansi umthetho wawuqhubela abaphristi, amadodana abaLevi, ababethwala ibhokisi lesivumelwano sikaJehova, kanye labadala bonke bako-Israyeli.

10 UMosi wasebalaya wathi, “Ekupheleni kweminyaka eyisikhombisa, ngomnyaka wokuxolelana izikwelede, ngeDili lamaThabanikeli, 11 ngesikhathi abako-Israyeli bonke bezokuma phambi kukaJehova uNkulunkulu wenu endaweni azabe eyikhethile, lizawubala lumthetho phambi kwabo bezizwela.

12 Lizabuthanisa abantu – amadoda, abafazi labantwana, kanye labezizweni abahlala emadolobheni enu – ukuze bazizwele bafunde ukwesaba uJehova uNkulunkulu wenu balandele ngonanzelelo wonke amazwi alumthetho. 13 Abantwabakho, abangawaziyo lumthetho, kumele bawuzwe njalo bafunde ukwesaba uJehova uNkulunkulu wenu ngaso sonke isikhathi lisahlezi kulelilizwe elizachapha uJodani ukuba liyelithatha.”

Kuyeza ukuhlamuka kuka-Israyeli

14 UJehova wathi kuMosi, “Usuku lokubhubha kwakho selusondele. Biza uJoshuwa lize lobabili eThenteni lokuHlanganela, lapho engizamgcobela khona.” Ngakho uMosi loJoshuwa bahamba bayazibika eThenteni lokuHlanganela.

15 UJehova wasebonakala eThenteni ngensika yeyezi, njalo iyezi lelo lema phezu komnyango weThente. 16 UJehova waphinda wathi kuMosi: “Ususiyaphumula laboyihlo, kanti-ke lababantu bazahugeka masinyazana bakhonze onkulunkulu balelilizwe abazangena kulo. Bazangifulathela bephule isivumelwano engasenza labo.

17 Mhla walolosuku ngizabazondela ngibafulathele; ngizabafihlela ubuso bami, njalo bazabhujiswa. Bazakwehlelwa zingozi ezinengi lobunzima phezu kwabo, njalo ngalolosuku bazabuza njalo bathi: ‘Kambe akusikuthi ingozi lezi zisehlela kubi kangaka ngoba uNkulunkulu wethu kakho phakathi kwethu na?’ 18 Ngiqinisile ubuso bami ngizabufihla ngalolosuku ngenxa yobubi babo ngokuphendukela kwabanye onkulunkulu.

19 Lobani lingoma liyifundise u-Israyeli ukuze ayihlabele, ukuze ibe ngufakazi wami wokumelana labo. 20 Ngizakuthi sengibangenise elizweni eligeleza uchago lezinyosi, ilizwe engalithembisa okhokho babo ngesifungo, bathi nxa sebedle basutha baphumelela, bazaphendukela kwabanye onkulunkulu babakhonze, bangiphike njalo bephule isivumelwano sami. 21 Kuzakuthi nxa sebehlaselwa zingozi lobunzima, ingoma le izakuba yibufakazi bokumelana labo ngoba ayiyikukhohlakala lakuzizukulwana zabo. Ngiyakwazi okulula kubo ukuba bakwenze, lanxa ngingakabangenisi elizweni engibathembise lona ngesifungo.” 22 Ngakho uMosi wabhala leyongoma mhlalokho wahle wayifundisa abako-Israyeli.

23 UJehova wanika uJoshuwa indodana kaNuni umlayo othi “Qina ube lesibindi, ngoba uzangenisa abako-Israyeli elizweni engabathembisa lona ngesifungo, njalo mina ngokwami ngizakuba lawe.”

24 Ngemuva kokuba uMosi eseqedile ukuloba egwalweni amazwi alowomthetho kusukela ekuqaleni kusiya ekucineni, 25 walaya abaLevi ababethwala ibhokisi lesivumelwano sikaJehova wathi: 26 “Thathani iNcwadi yoMthetho le liyifake malungana lebhokisi lesivumelwano sikaJehova uNkulunkulu wenu, izahlala lapha njengofakazi walokho elikwenzayo. 27 Mina ngiyakwazi ukuhlamuka kwenu lokuba lukhuni kwenu. Nxa kade lihlamukela uJehova ngisaphila njalo ngiselani, kuzakuba nganani ukuhlamuka kwenu nxa sengifile! 28 Buthanisani phambi kwami bonke abadala bezizwana zenu kanye lezikhulu zenu zonke, ukuze ngethule lamazwi bezizwela nginxuse izulu lomhlaba ukuba kufakaze ububi babo. 29 Ngoba ngiyakwazi ukuthi nxa ngingasekho sengifile lizaxhwala liphambuke endleleni engiliyale yona. Ezinsukwini ezizayo, lizawelwa yingozi ngoba lizakwenza ububi phambi kukaJehova limvuse ulaka ngemisebenzi emibi yezandla zenu.

Ingoma kaMosi

30 Ngakho uMosi wawaphinda amazwi engoma leyo kusukela ekuqaleni kusiya ekuphetheni ibandla lonke lako-Israyeli lilalele: